Foto e Naim Bajrit, 68 vjeçari i ekzekutuar tek markata e Rusit. RENEA mësyn Shkodrën, sekuestrohen kamerat
Nga Bepin Kolvata Përditësimi i fundit 3 Qershor 2022, 14:13
Prej mëngjesit kur qyteti u trondit nga vrasja e Naim Bajrit në Shkodër ka zbarkuar dhe RENEA. Forcat Speciale së bashku me FNSH dhe policinë e zonës po vijojnë krehjen e zonës dhe patrullimet nëpër qytet.
Atentati ndaj Naim Bajrit ndodhi mëngjesin e sotëm (3 qershor 2022) afër markatës së Rusit, në lagjen Partizani, një zonë tepër e frekuentuar në Shkodër.
Ishte ora 07:20 minuta kur Naim Bajri ishte ulur në tavolinën e jashtme të një lokali me punëtorin e tij Astrit Zeneli kur autorët janë afruar me makinë dhe kanë qëlluar drejt tij. Policia dyshon se hijet e një sagë te vjetër hakmarrjeje u rikthyen këtë të premte në Shkodër me ekzekutimin një anëtari të fisit Bajri.
68 vjeçari i vrarë në Shkodër është babai i Indrit Bajrit, i ekzekutuar në vitin 2001 nga Xhabir Shega, Kujtim Barbullushi dhe Ilimir Hajdari.
Xhabir Shega u vra 4 vite më vonë me snajper.
Grupi hetimor, ndërkohë ka sekuestruar pamjet e kamerave të sigurisë në zonë dhe në rrugën që përshkruan vrasësit me makinë për të rënë në gjurmët e tyre.
