Nje presidente nga Shkodra! Propozimi i ministres Bilali, qe synon te marre pelqimin e socialisteve
Nga Bepin Kolvata Përditësimi i fundit 3 Qershor 2022, 13:47
Një figurë që do të ketë pëlqimin jo vetëm të mazhorancës, por edhe të opozitës dhe gjithë shqiptarëve.
Kjo do të jetë përzgjedhja që socialistët do të bëjnë për presidentin e ri të Shqipërisë, shprehet ministrja e Shtetit për Sipërmarrjen, njëherazi drejtuese politike për Shkodrën, Edona Bilali.
"Presidenti duhet të jetë i shqiptarëve. Kjo na bën nder edhe ne" tha ajo në një prononcim për median.
Ministrja Bilali shprehet se nga 3 kandidatura të mundshme, ajo ka propozuar për President të ardhshëm dy gra shkodrane, emrat e të cilave nuk preferon t’i bëjë të ditura.
"Unë nuk do të bëj publik emrat por do të ndaj dy karakteristikat që kanë pasur kandidaturat e mija. Kam propozuar dy gra shkodrane të nderuara" zbuloi Bilali.
Drejtuesja politike e socialistëve foli edhe për procesin e zgjedhjeve se kryetarëve të PS në qarkun Shkodër ku aktualisht po shqyrtohen dosjet e kandidatëve ndërsa u bëri thirrje socialistëve që të lënë ndasitë sepse vetëm bashkimi mund të bëjë që PS të fitojë Shkodrën në zgjedhjet e ardhshme vendore.
Aktualisht në degët e PS të qarkut Shkodër janë rreth 25 kandidatura për Shkodrën, Malësinë e Madhe, Vau Dejësin, Pukën dhe Fushë Arrësin.
