Tifozët racistë hodhën banane ndaj lojtarëve me ngjyrë, trajneri anglez jep dorëheqjen
Nga OraNews Përditësimi i fundit 1 Qershor 2022, 17:49
Që një trajner të largohet nga një pankinë është gjëja më normale në botë, por që ai të heqë dorë nga detyra pasi sjellja e tifozëve të skuadrës së tij bie ndeshn me parimet që ka, kjo ndodh rrallë.
Bëhet fjalë për teknikun britanik të CSKA-së së Sofjes, Alan Pardew, i cili largohet nga stoli i skuadrës bullgare për shkak të gjesteve raciste të tifozëve.
Bashkë me të la detyrën edhe zëvendësi i tij me ngjyrë Alex Dyer. Vendimin e mori pas ngjarjeve të 19 majit kur 4 ditë pas humbjes në finalen e Kupës kundër Levskit, tifozët shënjestruan me gjeste raciste 4 lojtarë të skuadrës duke hedhur ndaj tyre edhe banane.
Fillimisht lojtarët refuzuan të zbrisnin në fushë por më pas edhe pse luajtën, kjo ngjarje e turbulloi jo pak anglezin.
“Ajo që ndodhi në ndeshjen me Plovdiv është e papranueshme, jo vetëm për mua por për të gjithë skuadrën. Unë nuk dua të stërvis një skuadër ku një grup i vogël tifozësh të tillë bëjnë pjesë. CSKA meriton shumë më shumë. Për fat të keq duhet t’i jap fund qëndrimit tim këtu”, theksoi Pardew.
