Turqia arreston liderin e ri të ISIS
Nga OraNews Përditësimi i fundit 26 Maj 2022, 16:52
Zyrtarë të lartë turq thanë se lideri i ri i ISIS-it është kapur në një bastisje të fundit në Stamboll.
Policia kundër terrorizmit dhe agjentët e inteligjencës arrestuan një burrë që besojnë se ka udhëhequr grupin ekstremist që kur shefi i tij i mëparshëm u vra në një operacion të SHBA në Siri në shkurt, thanë zyrtarët, duke kërkuar të mos identifikohej për shkak të ndjeshmërisë së çështjes.
Faqja turke e lajmeve OdaTV e identifikoi të arrestuarin si Abu al-Hassan al-Qurayshi pa thënë se si e mori informacionin. Dhe raportet e mëparshme kanë dhënë një emër të ngjashëm për liderin e ri të ISIS.
Presidenti Recep Tayyip Erdogan është informuar për kapjen e tij, thanë zyrtarët. Gjithashtu ato bëjnë me dije se lideri terrorist u kap pas mbikëqyrjes së gjatë të policisë së një shtëpie ku ai po qëndronte. OdaTV tha se policia nuk hapi zjarr gjatë operacionit për kapjen e tij.
Lajmi për ndalimin erdhi gjithashtu pasi Ankaraja po sinjalizon planet për një operacion të ri në territorin sirian për t'u përballur me forcat kurde të YPG-së të mbështetur nga SHBA-të, por që konsiderohen si terroriste nga Turqia për lidhjet e tyre me një grup militant që kërkon autonomi në vend. YPG mori mbështetjen perëndimore si një nga forcat më efektive që lufton për të çmontuar ISIS.
