Arbëreshet në Shkodër, vizitojnë kalanë, kishën e Zojës dhe Bashkinë: Sfidë ruajtja e gjuhës shqipe
Nga Bepin Kolvata Përditësimi i fundit 26 Prill 2022, 17:54
Rrënjët janë të rëndësishme për ta.
"Kemi të gjithë një gjak."
Për më shumë se 5 shekuj kanë ruajtur gjuhën, traditën, kulturat.
Por sot sfida më e madhe e arbëreshëve është që edhe të rinjve t’u përcillet gjuha.
"Në shtëpi, sidomos të vjetrit flasin vetëm gjuhën tonë, por më të rinjtë po e humbin këtë traditë. Jemi duke bërë përpjekje të hyjë në shkollat tona mësimi i gjuhës shqipe. Mundësia e mësimit të gjuhës ishte bërë e pamundur por po përpiqemi me të gjitha format, së paku të nisim kurse dhe më pas në rrugë zyrtare."
Me këngë, flamuj e zjarre u rikthen tek Kalaja e Rozafës në Shkodër.
"Rroftë Skënderbegu!"
Përkujtojnë 555-vjetorin e fitores së ushtrisë së Skënderbeut kundër forcave osmane dhe shtegtimin e figurës së “Zojës së Këshillit të mirë”, nga Shkodra në Itali.
Vizituan kishën e Zojës dhe u mirëpritën në zyrën e kryetarit të bashkisë Bardh Spahia.
Loris Scenderbeg: Duhet të jemi krenar që kemi këtë histori, traditë që duhet t'ja prezantojmë të gjithë botës. Shqipëria ka qenë pak në hije dhe e pavlerësuar për rolin që ka patur. Shqiptarët dhe italianët e jugut kanë gjak të përbashkët që i ka rrënjët e hershme, jemi ilirë.
Me veshjet tradicionale dhe këngët arbëreshe ato përshkuan rrugët e Shkodres, duke na dëshmuar edhe njëherë tjetër vlerat e këtij komuniteti që ju rrezistoi sfidave me të cilat historia i përballi.
