Blinken: SHBA beson se lufta në Ukrainë mund të zgjasë deri në fund të 2022

Nga OraNews Përditësimi i fundit 15 Prill 2022, 17:51

Sekretari i Shtetit Antony Blinken u tha aleatëve evropianë se Shtetet e Bashkuara besojnë që lufta ruse në Ukrainë mund të zgjasë deri në fund të vitit 2022. Kështu thanë për CNN dy zyrtarë evropianë, pasi zyrtarët amerikanë dhe evropianë së bashku kanë vlerësuar se nuk ka një periudhë afatshkurtër përfundimi në horizont të konfliktit.

Shumë nga zyrtarët që folën me CNN theksuan se është e vështirë të parashikohet saktësisht se sa kohë mund të vazhdojë lufta.

Disa zyrtarë thanë se nuk ka indikacione që qëllimet përfundimtare të presidentit rus Vladimir Putin kanë ndryshuar dhe nuk ka gjasa që ai të ndjekë negociatat diplomatike nëse nuk përballen me disfatë ushtarake.

Mendimi se ky mund të jetë një konflikt afatgjatë përfaqëson një ndryshim të dukshëm nga ditët e para të luftës, kur Rusia pritej të merrte shpejt kryeqytetin ukrainas të Kievit, dhe nënvizon dështimet e Moskës në fushën e betejës.

Dhe ndërsa zyrtarët theksuan se ka të ngjarë të vazhdojë vendosmëria ndërkombëtare për të ofruar nivele të larta mbështetjeje për Ukrainën, ata pranuan se mund të ketë sfida praktike shumë reale në lidhje me armatimin që do të duhet të trajtohet ndërsa lufta vazhdon.

Këshilltari për sigurinë kombëtare, Jake Sullivan tha të enjten se luftimet në Ukrainë ka të ngjarë të "zgjaten" dhe do të vazhdojnë "për muaj apo edhe më gjatë".

Disa anëtarë të Kongresit dhe ndihmësit e tyre po bëjnë në heshtje krahasimin me Luftën Koreane, e cila zgjati për tre vjet.

Dy zyrtarë të tjerë evropianë thanë se besojnë që luftimet në Ukrainën lindore, ku forcat ruse pritet të nisin një ofensivë të re, mund të zgjasin për katër deri në gjashtë muaj dhe më pas të rezultojnë në një ngërç.

Blinken, tha një zyrtar i lartë i Departamentit të Shtetit, "ka diskutuar me homologët e tij shqetësimin tonë se konflikti mund të zgjatet, por të gjitha angazhimet e tij janë rrotulluar rreth mënyrës më të mirë për ta ndalur atë sa më shpejt të jetë e mundur", shkruan CNN.