Në makinë me 10 thasë kanabis drejt Mirditës, arrestohen dy shokët
Nga OraNews Përditësimi i fundit 22 Mars 2022, 10:41
Dy të rinj janë arrestuar pasi po transportonin me makinë 10 thasë me kanabis, pasha totale 36 kg.
Policia kishte informacione në rrugë operative për lëvizjen e makinës në drejtim të Mirditës dhe në afërsi të fshatit Jezull, Mirditë, u organizua dhe u finalizua operacioni policor i koduar “Zmeja”.
“U bë lokalizimi dhe ndalimi i automjetit të dyshuar. Gjatë kontrollit në automjetin tip “Opel”, me drejtues shtetasin R. L. dhe pasagjer shtetasin K. Z., shërbimet e Policisë gjetën dhe sekuestruan në cilësinë e provës materiale 10 thasë me lëndë të dyshuar narkotike kanabis, me peshë totale 36 kilogramë” informoi sot policia e Lezhës.
Të arrestuarit janë R. L. 28 vjeç, banues në Zall Dardhë, Dibër dhe K. Z., 28 vjeç, banues në Kamzë, Tiranë.
Në vijim të operacionit është ushtruar kontroll në banesën e Roland Lalës në fshatin Zall Dardhë, Dibër, ku janë gjetur dhe sekuestruar në cilësinë e provës materiale 1 armë zjarri kallashnikov, një pistoletë shenjëdhënëse dhe municion luftarak.
Nën drejtimin e Prokurorisë, vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet procedurale i kaluan Prokurorisë së Rrethit Gjyqësor Lezhë, për veprime të mëtejshme, për veprat penale ”Prodhimi dhe shitja e narkotikëve”, kryer në bashkëpunim dhe "Armëmbajtja pa leje".
