Kapen 2000 kapsolla eksplozivësh, arrestohen “tregtari” nga Përmeti dhe blerësit nga Durrësi
Nga OraNews Përditësimi i fundit 15 Mars 2022, 09:02
2000 kapsolla elektrodetonatore që përdoren për shpërthime me eksplioziv u sekuestruan në Durrës. Në pranga përfunduan një 32 vjeçar nga Përmeti që do ti shiste dhe dy të rinj nga Durrësi si blerës.
Tre të rinj u arrestuan ditën e Verës në Durrës ku u sekuestruan 2000 kapsolla elektrodetonatore që përdoren për shpërthimin e eksplozivëve.
Municionet luftarake ishin sjellë në qytetin bregdetar nga 32=vjeçari nga Përmeti, Arif Qerimaj.
Sipas burimeve policore ai do tua shiste ato dy të rinjve nga Durrësi.
Vendtakimi ishte lënë zona e Shkëmbit të Kavajës.
Por policia e Durrësit kishte marrë informacion për trafikun e municioneve, ndaj ndërhyri në kohën e shkëmbimit të detonatorëve.
Arif Qerimaj që do të ti shiste përfundoi në pranga bashkë me Xhem Vakajn 22 vjeç dhe 18-vjeçaren Lorenca B.
Dy të rinjtë banues në Durrës do të blinin municionet, por mbetet e paqartë se për çfarë do ti përdornin më tej.
Veç sasisë prej 2000 kapsolla elektrodetonatore, në makinën e 22- vjeçarit Vakaj policia sekuestroi dhe një pulovër si ato të Policisë me simbole të Policisë, një kapuç dhe një thikë.
32-vjeçari nga Përmeti pritet të merret në pyetje në vijim për të mësuar ku i kishte marrë kapsollat, ndërsa dy të rinjtë nga Durrësi për qëllimin e blerjes së tyre.
Paralelisht po punohet për të zbuluar persona të tjerë që mund të jenë të përfshirë në trafikimin e municioneve luftarake.
Operacionet e vazhdueshme të policisë së Shtetit konfirmojnë lulëzimin e tregut të zi të armëvë, ndërsa vendi është përfshirë nga ngjarje të rënda kriminale që kanë prodhuar viktima e të plagosur.
Sipas të dhënave bombat me telekomandë po shiten deri në 3000 euro.
