Policia paralajmëron protestuesit: Shpërndahuni, ndryshe do të ndërhyjmë në zbatim të ligjit
Nga OraNews Përditësimi i fundit 11 Mars 2022, 20:13
Policia e Shtetit ka paralajmëruar protestuesit në kryeqytet që të shpërndahet, përndryshe do të ndërhyjë policia për të zbatuar ligjin.
Në një reagim Policia bën me dije se ata po pengojnë qarkullimin e mjeteve dhe të qytetarëve, duke bllokuar rrugët.
Policia e Shtetit: Në disa qytete të vendit grupe personash, kryesisht të rinj, janë konfrontuar me punonjësit e Policisë dhe në disa raste kanë bllokuar edhe lëvizjen e lirë të automjeteve dhe të qytetarëve. Nisur nga situata e krijuar, veçanërisht në Tiranë, ku grupe të rinjsh vijojnë të kundërshtojnë thirrjet e Policisë për t’u shpërndarë dhe për të liruar rrugët, Policia e Shtetit bën thirrje që personat që kanë bllokuar rrugën të shpërndahen menjëherë pasi punonjësit e Policisë do të ndërhyjnë në zbatim të ligjit për të shpërndarë protestuesit, me qëllim lejimin e lëvizjes së lirë të automjeteve dhe qytetarëve.
Policia e Shtetit, edhe një herë shpreh vendosmërinë për të mbrojtur të drejtat dhe liritë themelore të qytetarëve, edhe të atyre që protestojnë në mënyrë paqësore, dhe nuk do të tolerojë veprime të cilat bien ndesh me ligjin dhe cenojnë rendin e sigurinë, lëvizjen e lirë të qytetarëve dhe të automjeteve.
