"Kam bërë 12 orë punë, më zinte gjumi në këmbë për të ndërtuar shtëpinë", banori i "5 Majit" me çertifikatë pronësie në dorë kundërshton shembjen
Nga OraNews Përditësimi i fundit 9 Shkurt 2022, 07:55
Me certifikatë pronësie në duar, banorët e lagjes "5 Maji" në kryeqytet kundërshtojnë me forcë shembjen e banesave të tyre.
Ditën e sotme "5 Maji" është rrethuar me forca të shumta policie që në orët e para të mëngjesit, teksa priten shembje të tjera.
Shtëpitë e shembura sot janë ato të Atli dhe Ivzi Hoxhës.
Njëri prej banorëve kishte hipur mbi avllinë e shtëpisë dhe i bëri thirrje kreut të IMT-së, Margilen Qato që mos t'ia prishin shtëpinë.
"O Qato hajde këtu, unë jam një nga familjet e mëdha të Dibrës o Qato," tha një banor.
"Mbaje mend, do ballafaqohemi, po nuk shkove në burg ti bashkë me Edi Ramën. Ja certifikata e pronësisë, hajde merre. Kam bërë 12 orë punë në Itali, më zinte gjumi në këmbë për të bërë këtë ndërtesë, e di apo jo?"
"O kriminelë," dëgjohet të thërresë një banor tjetër.
Disa banorë të tjerë vazhdojnë të qëndrojnë brenda ambienteve të shtëpisë dhe refuzojnë t'i lirojnë banesat e tyre. Ata e kanë kaluar natën jashtë për të mbrojtur shtëpitë dhe për të mos lejuar ndërhyrjen e fadromave të IKMT-së.
