Mega-operacion në Elbasan: RENEA e FNSH po ekzekuton 27 urdhër arreste, mes tyre zyrtarë e të burgosur VIP
Nga OraNews Përditësimi i fundit 1 Shkurt 2022, 19:22
Një operacion masiv arrestimesh u zhvillua gjatë natës së 2 shkurtit në Elbasan.
Burime bëjnë të ditur për Ora News, se janë më shumë se 27 urdhër ndalimi të lëshuara pas hetimit te nisur nga Shërbimi i Kontrollit të Brendshëm të Burgjeve (SHKBB) që në 2021.
Bëhet e ditur se arrestimet po bëhen lidhur me akuzat për shpërdorim detyre.
Në këtë operacion po marrin pjesë Forcat e Ndërhyrjes së Shpejtë dhe Njësia Operacionale.
Deri tani janë prerë urdhërarrestetet për 8 punonjës të policisë të burgjeve dhe 17 persona të burgosur që aktualisht janë duke vuajtur dënimin.
Mes personave të arrestuar, është dhe Gazmend Braka, i njohur si “Gaxhai”. Mësohet gjithashtu se në pranga ka përfunduar dhe Hysni Ndreu, shefi i sigurise në Drejtorine e Burgjeve të Elbasanit.
Nga një hetim i kryer prej disa muajsh në bashkëpunim edhe me Drejtorinë e Përgjithshme të Burgjeve, është provuar se në burgjet si Elbasan, Peqin dhe Korçë, të dënuarit me ndihmën e punonjësve të policisë së burgjeve, fusnin drogë, pije alkoolike, telefona dhe femra që nuk i përkasin rrethit familjar bëjnë të ditur burimet për Ora News.
Madje dyshohet se organizonin dhe lojra fati. Policia ende nuk ka dalë me një deklaratë zyrtare lidhur me këto arrestime.
