Tragjedi në lumin Shkumbin, makina përfundoi në lumë, 3 viktima. Një person ende i bllokuar në mjet
Nga OraNews Përditësimi i fundit 1 Shkurt 2022, 11:01
Tre persona kanë humbur jetën nga aksidenti i rëndë që ndodhi rreth orës 09:10 në aksin rrugor Elbasan-Librazhd, vendi “Kthesa e Murrashit” ku një makinë ra në lumin Shkumbin. Në makinë kanë qenë 5 persona që po udhëtonin drejt Kalimashit.
Deri më tani raportohet se 2 persona janë nxjerrë nga makina, mes tyre një fëmijë.
Fëmija i moshës rreth 10 vjeç po transportohet në spitalin e Tiranës dhe mësohet se është në gjendje të rëndë për jetën.
Rryma e lumit mori me vete trupin e një prej personave i cili konfirmohet se ka ndërruar jetë.
Pavarësisht përpjekjeve të ekipit të shpëtimit për ta nxjerrë të gjallë, personi i cili mendohet të jetë i gjinisë mashkull ka ndërruar jetë.
Në vendin e ngjarjes ka mbërritur edhe kryeprokurori i Elbasanit, Kreshnik Ajazi.
Nga 3 personat që kanë humbur jetën, trupat e 2 personave janë nxjerrë, ndëra njëri prej tyre është ende i bllokuar në makinë.
