Anastas Angjeli vetëofrohet për kandidati të Këshillit Mbikëqyrës të Bankës së Shqipërisë
Nga OraNews Përditësimi i fundit 21 Dhjetor 2021, 16:25
Ditën e sotme në ambientet e Kuvendit të Republikës është zhvilluar seanca dëgjimore me disa prej kandidatëve për dy vakancat e shpallura, në Këshillin Mbikëqyrës të Bankës së Shqipërisë.
Mes kandidaturave të vetëofruara ishte edhe ajo e ish-deputeti i Partisë Socialiste Anastas Angjeli, i cili në prezantimin e tij u shpreh se kandidon për këtë post pasi mendon se ka përvojën e nevojshme për të dhënë ndihmën e tij në ndryshimin e kuadrit ligjor të Bankës së Shqipërisë.
Diskutimet në Këshillin Mbikëqyrës:
Anastas Angjeli: Mendoj që një kontribut që mund të jap është përmirësimi i kuadrit ligjor të Bankës së Shqipërisë. Ligji për Bankën e Shqipërisë është që nga viti 1997, pra për çerek shekulli nuk ka ndryshuar dhe ka nevojë të përmirësohet.
Përmirësime të tjera janë rritja e autonomisë e Bankës së Shqipërisë, duke e bërë atë më të pavarur nga ato që parashikon Kushtetuta. Gjithashtu ka disa akte të tjera nënligjore që kanë të bëjnë me auditin e brendshëm edhe ato duhet të përmirësohen. Dhe dy elementë të tjerë janë transparenca, që duhet të bëhet në përputhje me legjislacionin e vendit tonë, si dhe siguria kibernetike.
Endmon Spahio: Vende të tilla në Bankën e Shqipërisë janë për individë me një eksperiencë dhe përvojë të madhe. Kështu që mendoj se zoti Anastas Angjeli është një kandidaturë ekselente për këtë pozicion.
