Qeveria ndalon grumbullimet deri në 13 dhjetor, Berisha mbledh në 11 më shumë se 12 mijë persona në Stadium
Nga OraNews Përditësimi i fundit 9 Dhjetor 2021, 21:28
Ministria e Shëndetësi ka shtyrë deri në 13 dhjetor 2021 vendimin për të ndaluar grumbullimet në vendet e hapura dhe të mbyllura për të shmangur përhapjen e covid-19.
“Në urdhrin nr. 633, datë 17.11.2020, “Për ndalimin e grumbullimeve në vende të mbyllura apo të hapura”, të ndryshuar, bëhet ndryshimi si vijon: 1. Në pikën 1 të urdhrit, togfjalëshi “deri në datën 29.11.2021” zëvendësohet me togfjalëshin “deri në datën 13.12.2021”. Ky urdhër hyn në fuqi menjëherë dhe botohet në Fletoren Zyrtare.” – thuhet në vendim.
Ndërkohë në datë 11 dhjetor, ish-kryeministri Sali Berisha ka lajmëruar mbledhjen e Kuvendit Kombëtar të PD-së në stadiumin “Air Albania”.
Burime pranë kampit të Berishës, bëjnë me dije se pjesëmarrja pritet të jetë e lartë ku veç 4200 delegatëve që kanë firmosur do të kenë edhe një numër të madh pjesëmarrësish të tjerë.
Aktiviteti i demokratëve pritet të nisë prej orës 10:00 dhe do të zgjasë deri në orët e pasdites.
Nga ana tjetër ministri i Brendshëm, Bledi Çuçi dha sigurinë ditën e sotme se një Kuvend i tillë nuk do të ndalohet.
