Në pushtetin e ujit, shiu "paralizon" portet në Shqipëri, probleme nga bora në zonat malore
Nga OraNews Përditësimi i fundit 9 Dhjetor 2021, 20:14
Stuhia me ere të fortë dhe shi të dendur e zgjati në 18 orë qëndrimin në det të hapur pasagjerëve të linjes Brindisi-Vlorë.
"Brenda në det, jemi lodhur jemi rraskapitur."
Trageti mbërriti që në orët e mëngjesit, por dallgët e forta e pamundësuan ankorimin në port deri në rreth orës 18.
"Nga Italia jemi nisur në orën 23:30 mbrëmë."
"Ishte shumë e lodhshme, shumë e mundimshme, e turpshme mbi të gjitha."
Reshjet e shiut ndërkohë kanë shkaktuar rrëshqitje masive e për pasojë bllokim të rrugës kombëtare Vlorë-Radhimë, pranë vendit të quajtur Jonufër.
Siç tregojnë pamjet, dherat kanë marrë përpara edhe një makinë duke rrezikuar jetën e udhëtarëve aty.
Stuhia që erdhi nga deti riktheu edhe problematikën e vjetër të përmbytjeve në pjesën më të madhe të rrugëve të Vlorës.
Vonesa me tragetet ka edhe në Portin e Durrësit ku mbrëmjen e djeshme u shënua edhe një incident.
Trageti i linjës Bari-Durrës, “RIGEL III”, u përplas me kalatën nr.8, në pjesën e kiçit duke pësuar dëmtime e për pasojë udhëtimi u pezullua.
Në të gjithë vijën bregdetare ndërkohë është pezulluar dalja ne det e anijeve të vogla dhe peshkarexhave deri në qetësimin e situatës.
Reshjet intensive të shiut kanë përfshirë thuajse të gjithë vendin, duke krijuar problematika kryesisht në rrugë.
Nga ana tjetër, prurjet e lumit Drin po mbushin kaskadën e Drinit dhe banorët e Nënshkodrës i kanë sytë nga portat e Hecit të Vaut të Dejës.
Të dhënat tregojnë se aktualisht nuk ka gjasë të vendoset një hapje e portave, por asgjë nuk përjashtohet me shtimin e reshjeve.
Në zonat malore në veri e veri-lindje, problemet janë shkaktuar nga bora.
