“Jepni dorëheqjen mos u bëni skllevër”, nënkryetarët dhe sekretari i PD i përgjigjen Berishës: S’e shkelim statutin
Nga OraNews Përditësimi i fundit 23 Nëntor 2021, 20:50
Nënkryetarët e Partisë Ddemokratike dhe Sekretari i Përgjithshëm Gazment Bardhi i janë përgjigjur ish-Kryeministrit Sali Berisha, i cili ju bëri thirrje që të japin dorëheqjen.
Ata shprehen se Berisha ka nisur një fushatë të padenjë sulmesh ndaj nënkryetarëve dhe sekretarit të PD, ndërsa shtojnë se janë të vendosur të refuzojë shkeljen e Statutit për interesa personale të Sali Berishës
Sipas tyre kërkesa Berishës nuk ka asnjë lidhje me PD dhe asnjë lidhje me standartet demokratike.
Reagim i përbashkët i nënkryetarëve dhe sekretarit të përgjithshëm të partisë demokratike
Prej disa ditëve, për shkak të qëndrimit tonë në mbrojtje të demokratëve dhe interesit të Partisë Demokratike, z. Sali Berisha ka nisur një fushatë të padenjë sulmesh ndaj Nënkryetarëve dhe Sekretarit të Përgjithshëm të PD. Me keqardhje, përsëritet kërkesa që ne duhet të braktisim Partinë Demokratike dhe demokratët, dhe të bëhemi bashkë me Sali Berishën kundër partisë.
Secili prej nesh është i vendosur të refuzojë shkeljen e Statutit për interesa personale të Sali Berishës dhe izolimin e Partisë Demokratike. Kërkesa e z. Berisha nuk ka asnjë lidhje me PD, asnjë lidhje me standartet demokratike, asnjë lidhje me hallet dhe problemet e demokratëve. Demokratët kanë 8 vite që përballen me dhunën dhe terrorin e Edi Ramës, me krimin dhe bandat e tij dhe nuk jemi sprapsur as kthyer nga rruga për t’i shërbyer Shqipërisë dhe shqiptarëve. Ne e kemi për detyrë të jeni krah tyre.
Asnjë intimidim nuk do të ndikojë në qëndrimin tonë në krah të demokratëve, për një parti që u shërben atyre dhe jo që kthehet në mburojë të interesave personale të Sali Berishës, aleatëve të tij dhe cilitdo tjetër.
