Prezantohet paketa fiskale, Rama: Taksë zero! 2400 biznese më shumë se para mbylljes nga pandemia

Nga OraNews Përditësimi i fundit 22 Nëntor 2021, 18:00

Kryeministri Edi Rama dhe ministrja e Financave dhe Ekonomisë Delina Ibrahimaj, kanë prezantuar ditën e sotme paketën fiskale me një përfaqësi të biznesit të vogël.

Në fjalën e tij Rama u shpreh se për të gjitha bizneset e vogla do të vijohet që taksa mbi fitimin do të jetë zero.

Rama theksoi se aktualisht janë 110 mijë biznese të vogla dhe dhe tatohen zero, ndërsa vuri në dukje se më parë ishin 60 mijë dhe tatoheshin 10 për qind. Më tej kreu i qeverisë shtoi se biznesi i vogël është forca më e përkrahur dhe më e mbështetur nga qeveritë tona.

Edi Rama: Dua të sjell disa shifra, që është njëra shumë kuptimplotë për të pasur pamjen e situatës ku ndodhemi duke u nisur nga ku e ndërmorëm këtë përpjekje në krye të herës, bizneset ishin 60 mijë dhe tatoheshin 10 për qind, sot bizneset e vogla janë 110 mijë dhe tatohen zero. Kjo vlen edhe për t’ju thënë të gjithë atyre që flasin për mbyllje, falimentime, shkatërrime, dhe në radhë të parë të atyre që bien pre e kësaj propagande se në terrenin e fakteve dhe shifrave, biznesi i vogël është forca më e përkrahur dhe më e mbështetur nga qeveritë tona.

Tjetra që është prapë domethënëse, edhe pse ishin 60 mijë, gjatë periudhës 2006-2013 kanë paguar 19 miliardë lekë tatime. Nga 2014 në 2021 duke qenë 110 mijë kanë paguar vetëm 5.7 miliardë tatime, pra tre herë më pak. Diferenca nuk ka ikur në lumë, diferenca ka hyrë në familjet e këtyre sipërmarrësve të vegjël, bëhet fjalë për një diferencë jo të vogël, por për një diferencë 133 milionë dollarë.

Më tej Rama shtoi se janë 2400 biznese më shumë se para mbylljes totale nga pandemia

Edi Rama: Më tutje, sot ne kemi shifrën tjetër të rëndësishme për rimarrjen e gjithë ritmit nga biznesi i vogël pas mbylljes dramatike nga pandemia dhe faktikisht në tetor 2021 kur është bërë edhe numërimi më i fundit, janë 2400 biznese të vogla më shumë se sa përpara mbylljes nga pandemia. 67 për qind e bizneseve të vogla janë me certifikatë elektronike, dhe 30 për qind e bizneseve të vogla që lëshojnë faturë fiskale.