"Pak minuta për të dalluar abuzimin", psikologu të hetojë çdo detaj të bisedës me fëmijët
Nga OraNews Përditësimi i fundit 4 Nëntor 2021, 21:21
Një psikologu me eksperiencë i duhet vetëm pak minuta bisedë me një fëmijë për të dalluar nëse kemi të bëjmë me një rast të dyshuar dhunë. Nëse sistemi i referimit nuk ka funksionuar, atëherë duhet të shihet puna e psikologut.
Shumë pak minuta i duhen një psikologu për të dalluar nëse një fëmijë mund të jetë viktimë e abuzimeve.
Presidentja e Urdhrit të Psikologut, Valbona Tresa shpjegon se sjellje dhe detaje nuk duhet të neglizhohen por duhet të investigohet pas tyre.
"Një fëmijë që është 6-7 vjeç apo edhe pak më i vogël e ka shumë të vështirë të manipulojë, prandaj them që është aftësi e psikologut për të identifikuar qoftë edhe një bisede. Fjalinë e parë fëmija mund të ta mohojë, por fëmija munde që të vihet në siklet edhe nuk ndihet komod, në momentin që i krijon komoditet nuk ka fëmijë që nuk do ja referonte psikologut këtë," u shpreh Tresa.
Në shumë raste sistemi i referimit nuk ka funksionuar siç duhet, ose se nuk e ka vërejtur askush, ose se stafeta e trajtimit nuk ka kaluar te institucionet vepruese. Atëherë kur problemi ngec te psikologu, nuk duhet të mungojë as verifikimi i punës së tyre.
"Duhet të jesh vëzhgues shumë i mirë, duhet të jesh hulumtues shumë i mirë i emocioneve të atij fëmije. Nëse një psikolog e shmang këtë gjë, ose nuk di ta bëjë këtë gjë, atëherë na ngelet detyra e psikologut, duhet parë se çfarë nuk ka shkuar tek vetë psikologu," u shpreh Tresa.
Një psikolog duhet fillimisht të jetë pjesë e urdhrit të psikologut e të jetë i pajisur me licencë, ndërsa për punësimin e tij në sistemet shkollore duhet kalojë dhe disa kualifikime të tjera sipas kërkesave të ministrisë së Arsimit.
