Prokuroria heton helmimin në Krujë, ministrja Manastirliu viziton pacientët në spital
Nga OraNews Përditësimi i fundit 26 Tetor 2021, 11:44
Prokuroria e Krujës ka nisur prej ditës së djeshme hetimet për helmimin masiv të banorëve të Krujës, që dyshohet se ka ardhur nga konsumi i ujit të pijshëm.
Lajmi konfirmohet për Ora News nga burime nga organi i akuzës.
Situata ka nisur që prej pasdites së të dielës, 24 tetor. Deri të martën, 26 tetor, kanë marrë mjekim 300 persona, mes tyre edhe të mitur.
Paraditen e sotme në spitalin e Krujës mbërriti ministrja e Shëndetësisë Ogerta Manastirliu për të parë nga afër situatën.
Ajo tha se 370 persona kanë marrë trajtim në spital.
Manastirliu: Situata paraqitet e qetë, pa komplikacione. Nga dita e dielë dhe deri sot 370 qytetarë kanë marrë shërbim në spital. Vetëm sot janë paraqitur 60 qytetarë që pas shërbimit janë nisur në shtëpi. Tani janë edhe disa pacientë të tjerë që po marrin shërbim në urgjencë, rreth 30 qytetarë, adoleshentë, fëmijë dhe të rritur. Sa i takon investigimit, të gjithë strukturat po hetojnë të gjitha pistat. ISHSH dhe ISHP janë duke investiguar. Janë marrë monstrat e ujit, ushqimeve. Hetimi epidemiologjik po bëhet në të gjithë aspektet. Po pyeten çfarë kanë konsumuar. Do të kemi një rezultat pëërfundimtar kur të kemi analizat. Afati është 24-72 orë.
Ndërsa bashkia Krujë ka ndërprerë ujin në qytet, drejtoresha tha se spitali i Krujës po furnizohet me depozitat që ka.
Nga ana tjetër bashkia tha se deri në rikthimin e furnizimit nga ujësjellësi, bashkia do të shpërndajë ujë për qytetarët me autobote.
