70 milionë euro borxh për energjinë, deri në 1 janar jo rritje të çmimit të energisë për familjarët

Nga OraNews Përditësimi i fundit 25 Tetor 2021, 11:54

70 milionë euro do të jetë huaja që do të merret nga BERZH si fond sigurie prej KESH për situata të paparashikuara.

Në komisionin parlamentar të politikës së jashtme kreu i OSHEE, Adrian Çela shprehet se për konsumatorët familjar nuk do të ketë rritje të çmimit të energjisë, pavarësisht krizës ndërkombëtare. Por për subjektet e mëdha gjithçka do të rishikohet në janar.

Çela: Deri në datën 1 janar nuk ka asnjë prekje të tarifës. OSHEE ka bërë aplikimin pranë entit rregullator, i cili provon tarifat dhe nuk ka aplikuar për asnjë rritje tarife.Pjesa tjetër është pjesë e një reforme që ka nisur që me aprovimin e ligjit në sektorin energjitik në mars të 2015-ës ku parashikonte tregun e liberalizuar gradualisht, ka filluar më shumë se 10 vjet para, ka vazhduar me 97 subjekte në vitin 2018 dhe më 1 janar e gjithë pjesa tjetër që është e lidhur me tension të mesëm të dalin në tregun e lirë edhe si pjesë e një projekti që ka filluar nga Banka Botërore.Platforma ka përfunduar, është në momentet e fundit kolaudimi dhe marrja e kësaj platforme nëpërmjet OST dhe OSHEE, kështu që rritje tarifash për ata 1 milionë abonentë që furnizohen nga OSHEE nuk do të ketë.

Për opozitën në sektorin e energjisë janë marrë kredi për investime teknologjike, por çuditërisht janë shtuar dhe punonjësit.

Bushati: A mund të më jepni një përgjigje logjike si ka mundësi që investohen 500 milion euro në sistem dhe rritet numri i punonjësve?

Por për Çelën gjithçka ka lindur për mangësitë e trashëguara.

Çela: CEZ e kishte lënë kompaninë me mbi 10 mijë fatura aforfe, nuk kishte lexues që të bënin leximin.

Nuk munguan as përplasjet me ministren e energjisë, ku deputetët premtuan shembuj të situatës.

Gështenja: Po flas për shtylla druri të kohës së Enverit që janë dëmtuar aq shumë saqë kanë mbetur 2 metra mbi tokë.

Një muaj më parë kreu i qeverisë Rama deklaroi masa emergjente për krizën energjetike, duke vendosur pezullimin e investimeve që nuk kanë të bëjnë me situatën e krijuar.