Vdekja e 4 turisteve rusë/ ISHP merr prova të reja, eksperti i mjekësisë ligjore: Shkak mund të jetë asfiksia

Nga Edison Vatnikaj Përditësimi i fundit 21 Tetor 2021, 16:22

Pesë ditë pas ngjarjes së rëndë ku katër turistë rusë humbën jetën në një resort turistik në qQerret, ISHP ka kryer disa ekzaminime shtesë në lidhje me vendin e ngjarjes. Nga mjekësia ligjorë ende nuk ka përgjigje konkrete e ndërsa ekspertët e kësaj fushe, flasin për asfiksinë si shkaqe që mund të ketë shkaktuar vdekjen e shtetasve nga Rusia.

Vdekja e 4 turistëve rusë në resortin "Gloria Palace" në Qerret vijon të mbetet e mbuluar me mister ndërkohë që ekspertizat mbi shkakun e ngjarjes ende nuk kanë përfunduar.

Nga vendi i ngjarjes janë kryer disa verifikime ku deri më tani pista në të cilën po hetohet është ajo e vdekjes nga asfiksia edhe pse në Prokurori dosja është referuar për akuzën e vrasjes.

Eksperti Mjeko-Ligjor Albert Kreci nisur edhe nga rrethanat në të cilat humbën jetën 4  shtetasit rusë rendit shkaqet kryesore të cilat mund të ketë shkaktuar ngjarjen.

"Në rastin konkret të vdekjes janë 2 ose 3 mundësi në gjykimin tim. Mund të jetë një asfiksim nga klori që është jashtëzakonisht e mundur, mund të jetë një asfiksim nga dioksidi i karbonit të cilat pak a shumë shenjat i kanë të përafërta, vdekja vjen shumë shpejt.

Nëse sasia e klorit kalon pragun e limitit të lejueshëm kemi të bëjmë me një bllokim të muskulaturës të thithjes dhe hapjes së mushkërisë. Ky bllokim vjen për 5 deri në 10 minuta. Mendohet që saunat përdorin atë pjesën e djegur për nxehjen dhe për ngrohjen dhe djegia që bëhet te saunat nuk është e plotë, por çdo material i cili nuk bëhet djegie e plotë çliron dioksid karboni dhe duke çliruar dioksid karboni është një mundësi që asfiksia të vijë nga pjesa e saunës," tha Kreci.

Specialisti renditi edhe ekzaminimet që kryhen në raste të tilla kur shkaku u vdekjes endë mbetet i pa zbardhur.

"Kërkohen ekzaminime toksikologjike, ekzaminime të gjakut, të materialeve që merren nga trupi i kufomës," shtoi Kreci.

Kreu i ISHP Arben Luzati deklaroi një ditë më parë se ka kthyer mbrapsht provat materiale të marra në ujin e pishinës dimërore dhe klorin e përdorur në të, pasi nuk ishin në formën e kërkuar nga ligji.

Sipas tij, tashmë mostra e ujit dhe klorit janë marrë ku dhe ka filluar puna për analizimin e tyre me qëllimin për të parë nëse ka element vdekjeprurës./OraNews/