Aksi Berat-Skrapar pëson çarje e rrëshqitje, banorët: Pothuaj jashtë përdorimit
Nga Marko Diko Përditësimi i fundit 3 Tetor 2021, 13:37
Rruga nacionale Berat-Skrapar është dëmtuar nga gropa, çarjet në asfalt dhe shembjet në disa segmente.
Mungesa e mirëmbajtjes po sjell degradimin e saj të plotë edhe pse është i vetmi aks që lidh Beratin me Skraparin.
Më problematike rruga paraqitet në fshatrat: Vërtop, Mbrakull, Pronovik, Bogovë dhe Uji i zi ku aksi është edhe burim aksidentesh.
Banorë dhe drejtues mjetesh shprehen të shqetësuar për këtë situatë.
"Rruga Berat-Skrapar është në gjendje shumë të keqe. Iëkrkojëm qeverisë ta shikojë rrugën nacionale Berat-Skrapar se është jashtë përdorimit, është e shkatërruar plotësisht," thotë banori.
Ata thonë se cilësia e dobët e asfaltit e ka sjellë rrugën në këtë situatë.
"Ka mbi 5 vjet. Rrugët janë gropa-gropa, nuk është hedhur cilësia e duhur e asfaltit prandaj është gropa-gropa," thotë qytetari.
"Asfaltimi nuk është i rregullt, është bërë me copa-copa."
Një vit më parë, bashkia Poliçan ndërhyri në disa segmente për mbylljen e gropave por sërish ajo pësoi çarje e rrëshqitje duke i kthyer paratë e hedhura në dëm ekonomik.
