Pogradec/ Transportonte kanabis drejt Maqedonisë së Veriut, arrestohet bashkëpunëtori i 5-të

Nga OraNews Përditësimi i fundit 1 Tetor 2021, 12:36

Është vënë në pranga  bashkëpunëtori i 5-të i trafikantëve të drogës të ndaluar para disa ditësh nga policia, të cilët transportonin drogë  nga Pogradeci drejt Maqedonisë së Veriut.

Bëhet fjalë për 44-vjeçarin me iniciale S. O, banues në fshatin Blacë, Pogradec.

Gjatë dy fazave të para të këtij operacioni janë sekuestruar 61 kg kanabis, e ndarë në pako, sasi e destinuar për t'u trafikuar jashtë vendit si dhe u arrestuan 4 persona.

Dy fazat e para të operacionit “Hudënishti” u zhvilluan më 7 korrik dhe 14 shtator të këtij viti.

Materialet për hetime të mëtejshme i kaluan Prokurorisë pranë Gjykatës së Shkallës së Parë Pogradec.

Njoftimi i policisë:

Pogradec

Vijon operacioni policor i koduar “Hudënishti”.

Shkon në 5 numri i të ndaluarve në kuadër të këtij operacioni, vihet në pranga njëri prej shtetasve të shpallur në kërkim për veprat penale “Trafikimi i narkotikëve” kryer në bashkëpunim dhe “Kalimi i paligjshëm i kufirit shtetëror”.

Gjatë dy fazave të këtij operacioni, u sekuestruan gjithsej 61 kg lëndë e dyshuar narkotike kanabis, e ndarë në pako, sasi e destinuar për t'u trafikuar jashtë vendit.

Në vijim të operacionit policor të koduar “Hudënishti”, për parandalimin dhe goditjen e veprimtarisë kriminale të trafikimit të narkotikëve, të finalizuar në dy faza më datë 07.08.2021 dhe 14.09.2021, si rezultat i të cilit u ndaluan 4 shtetas, u shpallën në kërkim 4 të tjerë dhe u sekuestrua në cilësinë e provës materiale në total 61 kg lëndë e dyshuar narkotike kanabis, sasi e cila kishte destinacion trafikimin drejt Maqedonisë së Veriut, specialistët për Hetimin e Krimeve në Komisariatin e Policisë Pogradec, bënë të mundur ndalimin e shtetasit të shpallur në kërkim S. O., 44 vjeç, banues në fshatin Blacë, Pogradec.

Gjykata e Rrethit Gjyqësor Pogradec, me vendimin e datës 13.08.2021, ka caktuar masën e sigurisë “Arrest në burg” ndaj 44-vjeçarit, për veprat penale të lartpërmendura, i cili nga verifikimet e kryera rezulton të ketë kaluar kufirin në mënyrë të paligjshme drejt vendit tonë.

Materialet për hetime të mëtejshme i kaluan Prokurorisë pranë Gjykatës së Shkallës së Parë Pogradec.