Budina: Kullat dhe paratë e pista do të pëlcasin një ditë, Shqipëria do të shkojë më keq se ’97-ta

Nga OraNews Përditësimi i fundit 3 Shtator 2021, 16:12

Në një intervistë për Ora News, regjizori Edmond Budina u shpreh se deri më tani janë depozituar 16 padi në SPAK, por deri më tani nuk asnjë të dhënë për hetimet.

Ai tha se nëse nuk merren hapa kjo do të thotë se SPAK-u dhe prokurorët janë të kapur sepse kanë krijuar një mur dhe një zinxhir të tyre që ne dyshojmë se ka vepra korruptive.

Budina: Ne deri më tani kemi depozituar 16 padi në SPAK, por deri më tani nuk kemi asnjë të dhënë për hetimet. Ne nuk kërkojmë që të ndërhyjmë në hetime, por ama si qytetarë kemi të drejtë që të informohemi. Ne duam një informacion të saktë në bazë të asaj që na jep kushtetuta. Sepse zullumet nga kjo bandë mafioze vazhdojnë që të shkojnë përpara. Gjykata kushtetuese dha vendimin dhe ktheu pronën pas, por ata e shkelën këtë vendim me të dyja këmbët. Prandaj ne kemi të drejtë të mësojmë se çfarë po ndodh sepse është e drejtë ligjore. Ata thonë se janë filluar hetimet, por pa përmendur asgjë konkrete. Ne nuk kemi parë një sekuestrim preventiv për atë truall dhe atë objekt. Pastaj ata të vazhdojnë hetimet e tyre edhe më të thella.

Nëse nuk merren hapa kjo do të thotë se SPAK-u dhe prokurorët janë të kapur sepse ne shohim që kanë krijuar një mur dhe një zinxhir të tyre që ne dyshojmë se ka vepra korruptive. Ata sjellin argumente qesharakë dhe jo bindës lidhur me këtë çështje. Ne kemi të drejtë kundrejt këtij muri që i shërben këtij pushteti dhe mafies. Të gjithë këta i shërbejnë pushtetit të mafies dhe kësaj flluske të madhe që një ditë do të shpërthejë. Këto ndërtime dhe para të pista që lahen me këto kulla një ditë do të pëlcasë dhe Shqipëria do të shkojë më keq se sa ishte në vitin 1997. Njerëzit do të ngelen pa rroga dhe pensione. Ata do të vazhdojë të mbushin xhepa dhe do të ikin pastaj.

Budina shtoi se kjo është një qeveri fashiste, që shembi teatrin pa asnjë rregull dhe ligj, me njerëz që ishin akoma brenda.

Budina: Ne kërkojmë drejtësi për teatrin sepse është një afera e madhe korruptive. Kjo është një qeveri fashiste, që shembi teatrin pa asnjë rregull dhe ligj, me njerëz që ishin akoma brenda. Këtu edhe ministrat nuk dihet se kush do të vihet, sepse e di vetëm një person. Të gjithë anëtarët e PS dhe PD rrinë në gatishmëri të njëshit. Vendimet duhet të merren në mënyrë kolegjiale. Ministrat thonë që është lojtar që e vendos Rama në çdo pozicion që ai do. Kjo nuk është lojë sepse ka të bëjë me jetët e njerëzve, sepse ministrit nuk i merret parasysh as mendimi, çka tregon se nuk kanë as dinjitet njerëzor.