Spezia “flet” shqip. Zyrtarizon dy sulmuesit shqiptarë, Manaj dhe Bozhanaj
Nga OraNews Përditësimi i fundit 31 Gusht 2021, 18:01
Një për sot dhe menjëherë dhe një për të ardhmen. Spezia ka bërë dy goditje “shqiptare” në merkato teksa ka zyrtarizuar dy sulmuesit kuqezi, Rey Manaj dhe Kleiz Bozhanaj.
Teksa i pari ishte kompletuar dhe pritej vetëm zyrtarizimi, për të dytin u bë gjithçka konkrete në orët e fundit të merkatos.
Rey Manaj do të jetë menjëherë pjesë e Spezias këtë sezon për të luajtur shanset në Serinë A, ku u huazua me të drejtë blerjeje 3 mln Euro nga Barcelona, ndërsa Bozhanaj është një goditje në perspektivë, shkruan Ora News.
20-vjeçari, pjesë e Shqipërisë U-19, ishte protagonist sezonin e kaluar me të rinjtë e Empolit ku fitoi titullin kampion Primavera në Itali ndërsa tani do të jetë i Spezias dhe këta të fundit vendosën ta huazonin.
Kështu për të luajtur rregullisht, Bozhanaj do të luajë në kategorinë e dytë portugeze në huazim për një sezon me ekipin, Casa Pia AC, ku do të ketë shans të tregojë edhe vlerat e tij.
