Ancelotti ndryshon programin për sulmin, përforcimi ndodhet në "shtëpi"
Nga OraNews Përditësimi i fundit 21 Gusht 2021, 13:50
Duke parë se Real Madrid po dorëzohet për Mbappe, të paktën këtë verë, drejtuesit po shikojnë për zgjidhje të shpejta për çështjen e sulmit pasi Benzema nuk mund t'ia dalë i vetëm këtë sezon.
Siç shkruan e përditshmja "AS", i gjendur në këtë situatë, Carlo Ancelotti ka vendosur të ndryshojë programin për sulmin duke ndryshuar kartat e merkatos.
Luka Joviç e Mariano janë dy sulmues që Real Madrid i ka në skuadër dhe ishin në shitje por tanimë vetëm njëri prej tyre do të largohet.
Trajneri italian ka bërë zgjedhjen e tij dhe ua ka komunikuar të dy lojtarëve, njëri ikën e tjetri qëndron.
Kështu, Luka Joviç do të qëndrojë te Real Madrid për të patur një shans të ri dhe Ancelotti mendon se mund t'i rikthejë formën e dikurshme ndërsa Mariano do të shitet, teksa ofertat nuk mungojnë.
Me këtë lëvizje, mbyllet edhe merkato e Real Madrid për repartin e sulmit teksa vitin tjetër, Mbappe do të jetë me çdo kusht në frontin e parë të Perez në merkato.
