IKMT zbarkon në Sinec, kontrollet e inspektorëve gjejnë kundravajtje dhe shkelje ligjore
Nga OraNews Përditësimi i fundit 11 Gusht 2021, 19:53
Tre inspektorë të IKMT-së Elbasan kanë kryer inspektimin e të gjithë zonës në Sinec ku firma Salillari po kryhen punimet për ndërtimi e një ujësjellësi dhe kanë verifikuar edhe shkeljet e kryera në kanionin e Sinecit.
Inspektimi është kryer pas vendimit të marrë nga ADZM Elbasan për pezullimin e punimeve në këtë zonë,të cilësuar “zonë e mbrojtur” e kategorisë së tretë.
Kanë qenë 3 inspektorët e IKMT-së Elbasan: Klajdi Merxhani, Aranit Çela dhe Ardian Lufo ata që kanë mbajtur edhe proces-verbalin e konstatimit të kundravajtjeve, proces-verbal i mbajtur në datën 05.08.2021.
Inspektorët ushtruan kontroll në bashkinë Kuçovë dhe në kantierin e ndërtimit në Kanionin e Sinecit (monument natyre) dhe konstatuar kundravajtje ligjore.
Sipas inspektorëve janë konstatuar kundravajtjet: marrja pa leje administrative e ujit, mospajisje me autorizim, veprimtari që kryhen në kundërshtim të mbrojtjes së brigjeve dhe ndërtimin e objekteve për shfrytëzimin e burimeve.
Pasi verifikuan dhe konfirmuan të gjitha kundravajtjet administrative që u kontatuar nga ADZM Elbasan, inspektorët e IKMT-së Elbasan vendosën për njoftimin e kryeinspektorit, me qëllim vazhdimin e mëtejshëm të procedurave ligjore.
