Aksidentet nuk ndalen, plagoset turisti boshnjak në Lezhë, kaos e trafik në rrugët e vendit
Nga Elvis Hila Përditësimi i fundit 5 Korrik 2021, 13:08
Një turist boshnjak mbeti i plagosur pasi motori me të cilin udhëtonte u përplas nga një makinë në aksin Lezhë-Shkodër. Në të njëjtën rrugë u përplasën edhe dy mjete, çka shkaktoi trafik të rënduar. Aksident i trefishtë ndërkohë në Fier-Patos, fatmirësisht pa të lënduar.
Një turist boshnjak mbeti i plagosur në një aksident automobilistik ndërsa po vizitonte Shqipërinë.
Ai po udhëtonte me motor si pjesë e një grupi turistësh, ku u përplas nga një makinë.
Aksidenti ndodhi paraditen e të hënës në superstradën Lezhë-Shkodër, pranë fshatit Ishull-Shëngjin.
Sipas burimeve, shkak u bë ndërprerja e mënjëhershme e rrugës nga ana e një makine që drejtohej nga një shtetas nga Kosova.
Turisti boshnjak mori ndihmën e parë mjekësore dhe mësohet se ndodhet jashtë rrezikut për jetën.
Pak minuta më vonë një tjetër aksident ndodhi në superstradën Lezhë-Shkodër.
Dy makina u përplasën pranë kryqëzimit të Gjadrit dhe njëra përfundoi në flakë.
Fatmirësisht nuk pati persona të plagosur, por lëvizja në superstradë u rëndua.
Radha e mjeteve shkoi në disa kilometra, dhe u kërkua ndërhyrja e policisë për të normalizuar lëvizjen.
Aksident i trefishtë u regjistrua në Fier-Patos.Një makinë që drejtohej nga një efektiv policie u përplas me një mjet tjetër dhe një autobus.
Fatmirësisht nuk pati persona të lënduar.
Ndërkohë një makinë u dogj në Tiranë, pranë vendit të quajtur Kthesa e Kamzës.
