Xhaçka përsërit thirrjen, Shqipëria kërkon më të mirë për tu përfaqësuar në Këshillin e Sigurimit

Nga OraNews Përditësimi i fundit 21 Qershor 2021, 19:59

Pas votëbesimit në seancën e 11 qershorit në Asamblenë e Përgjithshme të OKB, prioriteti i qeverisë shqiptare është ekipi i ekspertëve që do të përfaqësojnë Shqipërinë në mandatin 2 vjeçar në Këshillin e Sigurimit, një moment historik në marrëdhëniet mes vendit tonë dhe OKB.

Me anë të një videomesazhi, ministrja e Punëve të Jashtme Olta Xhaçka, shprehet se kemi nevojë për talente e ekspertizë shumë specifike në ekipin tonë.

"Kemi nevojë për më të mirët, më të mirëarsimuarit, për ata me më shumë përvojë" thotë ajo.

Nëse jeni diplomuar në:

- marrëdhënie ndërkombëtare apo shkenca politike dhe keni së paku 5 vjet eksperiencë pune;

- drejtësi, dhe keni së paku 5 vjet eksperiencë pune në të drejtë ndërkombëtare;

- studime mjedisore, me fokus të veçantë tek ndryshimet klimatike, sfidat e ujit dhe konflikteve;

- keni studiuar apo keni eksperiencë në funksionimin e OKB apo metodat e punës së Këshillit të Sigurimit;

Aplikoni në https://punetejashtme.gov.al/.../apliko-per-garen-per... deri më 30 qershor 2021 si kandidaturë e mundshme e ekipit shqiptar në Këshillin e Sigurimit.

Shqipëria, anëtare jo e përhershme e Këshillit të Sigurimit

Në 11 qershor Shqipëria u zgjodh anëtare jo e përhershme e Këshillit të Sigurimit të Kombeve të Bashkuara. Kjo shënon herën e parë të përzgjedhjes në këtë funksion, pas 65 vitesh nga anëtarësimi i saj në Organizatën e Kombeve të Bashkuara.

Këshilli i Sigurimit, një organ i OKB-së me kompetenca të fuqishme, përbëhet nga 15 anëtarë, 5 prej të cilëve të përhershëm, ShBA, Mbretëria e Bashkuar, Franca, Rusia dhe Kina që kanë të drejtë vetoje si dhe 10 anëtarë jo të përhershëm, me një mandat dy vjeçar. Shqipëria, Brazili, Gaboni, Gana dhe Emiratet e Bashkuara Arabe ishin në garë, pa konkurentë nga rajonet përkatëse, për 5 vendet. Për t’u zgjedhur, secilës prej tyre i duhej të siguronte dy të tretat e votave të vendeve anëtare të OKB-së. Shqipëria mori 175 vota. Votimi ishte i fshehtë.

Shqipëria është vendi i vetëm që nuk ka qënë asnjëherë anëtare e Këshillit të Sigurimit. Vendet kandidate do të zëvendësojnë pesë anëtarë aktualë, Estonia, Nigeri, Saint Vincent dhe Grenadines, Tunizia dhe Vietnami. Mandati i anëtarëve të rinj fillon më 1 janar 2022 dhe do të shërbejnë deri në 31 dhjetor 2023. Pesë shtetet e tjera në grupin e 10 anëtarëve jo të përhershme janë India, Irlanda, Kenia, Meksika dhe Norvegjia.

Këshilli i Sigurimit merret me paqen dhe sigurinë ndërkombëtare. Ai ka kompetenca të dërgojë paqeruajtës në rajone të trazuara, si dhe të miratojë sanksione.