LGBT denoncon dhunimin e transgjinores në Tiranë, Ambasada Gjermane: Policia të zbardhë sulmin

Nga OraNews Përditësimi i fundit 17 Qershor 2021, 12:20

Aleanca LGBT ka denoncuar se një 21-vjeçare transgjinore është dhunuar fizikisht dhe verbalisht në rrugët e Tiranës për shkak të identitetit të saj seksual.  

21-vjeçarja transgjinore ka bërë kallëzim në polici dhe kjo e fundit thotë se po punon për identifikimin dhe kapjen e autorëve.

"Me datë 16.06.2021, shtetasi me iniciale E. M., 21 vjeç, kallëzon se në rrugën “Vëllëzërit Manastirli” e kanë goditur disa persona ende të paidentifikuar. Specialistët e Komisariatit të Policisë Nr.2, pas marrjes së kallëzimit e kanë pajisur të dëmtuarin me vendimin mjeko-ligjor dhe po punojnë për identifikimin dhe kapjen e autorëve".

Për këtë ngjarje ka reaguar edhe Ambasada Gjermane e cila e konsideron tronditëse këtë sulm, ndërsa i kërkon policisë që ta zbardhë sa më parë.

"Me tronditje mësuam për sulmin brutal ndaj një anëtari të komunitetit të LGBTIQ mbrëmjen e djeshme në Tiranë. Sulmi, i cili mesa duket lidhet me identitetin seksual të viktimës, duhet të zbardhet plotësisht dhe menjëherë nga policia dhe organet e drejtësisë.

Ne si Ambasadë Gjermane kundërshtojmë me vendosmëri çdo forme të dhunës verbale dhe fizike, në përgjithësi dhe e drejtuar kjo ndaj pakicave dhe anëtarëve të lëvizjes LGBTIQ. Ne do të vazhdojmë mbështetjen tonë për barazinë dhe kundër diskriminimit".

Aleanca LGBT ka publikuar në rrjetet sociale disa foto ku thotë se një 21-vjeçare transgjinore është dhunuar verbalisht dhe fizikisht nga 10 djem në Tiranë.