Reja: Lodhja ndikoi te lojtarët, nuk është rezultati i drejtë
Nga OraNews Përditësimi i fundit 8 Qershor 2021, 23:01
Trajneri Edy Reja e pranoi se skuadra bëri disa gabime në miqësoren me Republikën Çeke por sipas tij lojtarët u impenjuan në maksimum duke dhënë edhe gjëra pozitive. Timonieri kuqezi pohoi se rezultati mund të ishte ndryshe ndërsa u kap edhe me arbitrin..
Loja e skuadrës. ”Nuk ndryshoi vendosja taktike e skuadrës. Nuk kishim përqëndrim të madh dhe ishim pak të lodhur. Në këtë periudhë të sezonit nuk mund të pretendosh të japësh 100%. Atana bënë gola të bukur dhe ne prodhuam raste. Më vjen keq që humbëm me këtë rezultat pasi nuk e meritonim të humbnim 3-1, mbase 2-1 po. Patëm dhe ne rastet tona, ndodhi dhe ai incident që gjyqtari dha një vendim të padrejtë. Nuk do të merremi me gabimet arbitrore sepse ishte miqësore. Sigurisht disa gjëra pozitive po vijnë dalë nga dalë”.
Vlerësimet për lojtarët. ”Për impenjimin skuadrës i jap notën 10, lojtarët dhanë maksimumin pa u tërhequr në asnjë moment, jemi përballur me dy skuadra shumë të forta fizikisht, si me Uellsin dhe Çekinë ka lojtarë që kur nisin kundërsulme është e vështirë ti ndalosh. Duhet të përmirësohemi në pasat finale, me Uellsin u përpoqëm të zotëronim më shumë topin, një pjesë loje ja dolëm”.
Gabimet në mbrojtje. ”Sigurisht ndikoi lodhja ditën e sotme, ndeshjen me Uellsin ishim më të freskët më të fortë, por bëmë një ndeshje të mirë sipas meje. Rezultati mund të ishte më i mirë duhet të jemi të ndërgjegjshëm që u përballëm me dy skuadra shumë të forta, e rëndësishme është të ulemi dhe të analizojmë, gabimet ndodhin por skuadra është në mbyllje të sezonit".
Rrëzimi: ”Një herë u rrëzova kur isha në Shqipëri gjatë një konference, herën e dytë në Uells, shpresojmë të kem mbaruar me kaq. Sigurisht kur përplasen me mua dëmtohen dhe kundërshtarët sepse jam rezistent”.
