Defender21/ Vazhdon zbarkimi i trupave amerikanë në portin e Durrësit
Nga OraNews Përditësimi i fundit 3 Maj 2021, 15:44
Ministri i Mbrojtjes, Niko Peleshi me ka postuar një video në Facebook-un e tij ku tregon se vazhdon zbarkimi i trupave dhe mjeteve amerikane në kuadër të stërvitjes më të madhe ushtarake Defender21.
Zbarkimi i mjeteve po zhvillohet në portin e Durrësit dhe sipas ministrit Peleshi, gjithçka është gati për të filluar stërvitjen e përbashkët.
Postimi i plotë:
"Nga porti i Durrësit ku vazhdon me ritëm zbarkimi i trupave dhe mjeteve amerikane. Gjithçka gati për të çelur stërvitjen e përbashkët më të madhe, të zhvilluar në Shqipëri, nga ushtria amerikane dhe forcat tona të armatosura në kuadër të NATO, Defender Europe 21.
#defendereurope21"
“Defender Europe 21” është një stërvitje e organizuar nga ushtria amerikane në Europë dhe Afrikë dhe parashikohet të marrin pjesë rreth 28 mijë trupa nga 26 vende aleate dhe partnere. Shqipëria do të jetë një nga 16 vendet që do të mirëpresin zhvillimin e kësaj stërvitjeje ushtarake, e cila ka për qëllim ndërveprimin e aleatëve dhe reagimin në raste krizash.
Në kuadër të stërvitjes së përbashkët me komandën e ushtrisë amerikanë në Evropë të koduar me emrin “Defender Europe 21”, në ambientet e Portit Detar të Durrësit më 4 Maj (ditën e nesërme) ora 9:30 do të zhvillohet eventi i parë, Dita e Vizitorëve të Shquar (DV- Day).
Të pranishëm do të jenë autoritetet më të larta civile e ushtarake në vendin tonë, ato amerikane dhe NATO.
