U plagosën në Mamurras nga kolegu, dy policët te Trauma për mjekim
Nga OraNews Përditësimi i fundit 13 Prill 2021, 17:24
Ky është momenti kur dy efektivët e plagosur të policisë së Mamurrasit mbërrijnë me autoambulancë në spitalin e Traumës.
Flamur Lleja dhe Ilir Zekaj, efektivë të patrullës së Përgjithshme ishin në shërbim kur rreth orës 13:35, në qendër të qytetit të Mamurrasit, disa persona janë konfliktuar me ta.
Një nga punonjësit e Policisë ka nxjerrë armën e shërbimit dhe ka qëlluar dhe për pasojë janë plagosur dy kolegët e tij, Flamur Lleja dhe Ilir Zekaj, si dhe një nga personat e përfshirë në konflikt, shtetasin Nikoll Vorfi alias Nikoll Fufi, të cilët ndodhen jashtë rrezikut për jetën.
Lexo edhe- Zbardhet plagosja në Mamurras, polici qëlloi dy kolegët dhe një prej vëllezërve Fufi pas konfliktit
Është krijuar menjëherë një grup i posaçëm hetimor, i përbërë nga Specialistë të Hetimit në Shërbimin për Çështjet e Brendshme dhe Ankesat në Ministrinë e Brendshme dhe Specialistë të Hetimit në Drejtorinë Vendore të Policisë Lezhë, dhe nën drejtimin e drejtuesit të Prokurorisë së Rrethit Gjyqësor Kurbin, vijon puna intensive në vendin e ngjarjes, duke administruar çdo provë dhe po marrin dëshmi, me qëllim sqarimin në mënyrë të plotë dhe të gjithanshme të kësaj ngjarjeje.
Informacion më të detajuar do të japë Shërbimi për Çështjet e Brendshme dhe Ankesat, në përfundim të veprimeve të para hetimore.
Lexo edhe-Përplasje në qendër të Mamurrasit/ Tre të plagosur mes tyre dy policë
