Basha në Kalimash: Më 25 prill heqim traun. Rruga e Kombit sot u bë "blu"
Nga OraNews Përditësimi i fundit 2 Prill 2021, 11:52
Dy vite pasi qytetarët e dogjën dhe e shkatërruan, Lulzim Basha, u ndal përpara traut të pagesës në rrugën e Kombit, këtë herë për të ripërsëritur një zotim të prerë:
"Për çdo shqiptare dhe çdo shqiptar, nga Konispoli në Podujevë do të jetë heqja e traut," tha Basha.
Nga Kalimashi Basha, rrugëtoi për në qytetin e Kukësit ku ndalesa e parë ishte tek Busti i shkrimtarit Havzi Nela.
Në Kukës kryetari i opozitës u takua me qytetarë dhe biznese, ndërsa tha se politikat e mbrapshta të qeverisë e kanë zhytur vendin në varfëri.
"Qeveria e Rilindjes e ka shkelur Kukësin me këmbë, duke shkatërruar ekonomitë tuaja familjare," shtoi Basha.
Kreu i demokratëve tha se projekti i tij nesër në qeveri, do ta kthej në vëmendje ekonominë e Kukësit si një urë lidhëse mes Kosovës dhe Shqipërisë.
