PD: Drejtori i sigurisë në Policinë e Shtetit ish-sigurims, u konfirmua në detyrë në shkelje të ligjit
Nga OraNews Përditësimi i fundit 19 Gusht 2020, 18:19
Partia Demokratike akuzon Drejtorin e Sigurisë Publike në Policinë e Shtetit, Gjovalin Loka, i cili kaloi sot vettingun, se ka qenë pjesë e sigurimit të shtetit në vitin 1991.
Përmes një postimi në Facebook, ish-deputeti Klevis Balliu, shkruan se Gjovalin Loka u konfirmua në detyrë në shkelje të ligjit.
Sipas tij, bashkëpunëtorët dhe oficerët e Sigurimit të Shtetit ndalohen të shërbejnë në radhët e Policisë.
Postimi i Balliut në Facebook
Sot Policia e Shtetit është njohur zyrtarisht si institucioni që drejtohet nga ish spiunet e Sigurimit të Shtetit, strukturës më shkatërruese për jetën dhe dinjitetin e njeriut gjatë regjimit komunist. Vetingu në polici konfirmoi në krye të policisë numrin 2 të saj, Gjovalin Loka, njëkohësisht përgjegjës për sigurinë publike.
Ish Sigurimsi i Shtetit, u konfirmua në detyrë nga Vetingu partiak në Polici, pavarësisht se ai e kishte fshehur detyrën e operativit të Sigurinit dhe pavarësisht se ligji e ndalon kategorisht një sigurims të jetë pjesë e Policisë së Shtetit. Neni 38/g i ligjit për Vetingun në Polici shprehet se “bashkëpunëtorët dhe oficerët e Sigurimit të Shtetit ndalohen të shërbejnë në radhët e Policisë”.
Komisioni, që mori vendimin e paligjshëm nuk e ka tagrin të vlerësojë, nëse Gjovalin Loka ka qenë sigurims i mirë apo i keq.
Të gjithë janë anëtarë të së njëjtës bandë, që vazhdojnë të përdorin metodat e Sigurimit të Shtetit, raprezaljet kundër opozitës dhe kritikëve të qeverisë për të mbajtur në këmbë një pushtet të kalbur dhe të dëmshëm për qytetarët.
Lexo edhe: Konfirmohet në detyrë Drejtori i sigurisë në Policinë e Shtetit, Gjovalin Gjoka
