Zhbllokohet eksporti i prodhimeve bujqësore të Shqipërisë drejt Maqedonisë
Nga OraNews Përditësimi i fundit 25 Nëntor 2015, 20:21
Maqedonia ka hequr sot bllokadën ndaj prodhimeve bujqësore nga Shqipëria. Vendimi vjen pas reagimit të autoriteteve zyrtare të Tiranës dhe komunikimeve intensive midis Ministrive të Ekonomisë të të dyja vendeve.Ministri i Ekonomisë i Maqedonisë, Bekim Neziri, teksa komunikoi vendimin dha garancinë se një gjë e tillë nuk do të ndodhë më dhe se duhet të respektohen parimet e CEFTA-s.Sipas tij, problemi u shkaktua nga një rregullore e Ministrisë së Bujqësisë së Maqedonisë, e cila duhet të ndryshojë sa më shpejt.Ministri i Zhvillimit Ekonomik të Shqipërisë, Arben Ahmetaj dje alarmoi bllokimin e perimeve në kufi nga ana e autoriteteve të Maqedonisë, edhe pse sipas tij, duhet të respektohet marrëveshja për tregti të lirë CEFTA.Shqipëria dhe Maqedonia janë nënshkruese të Marrëveshjes për Tregti të Lirë në Evropën Qendrore – CEFTA, që trajton zgjerimin e tregtisë së mallrave dhe shërbimeve, duke eliminuar të gjitha barrierat tregtare mes palëve.
