Përgjigjet PS, Bare sulmon ish-qeverisjen e djathtë për Lazaratin
Nga OraNews Përditësimi i fundit 16 Janar 2015, 14:13
Partia Socialiste iu përgjigj me të njëjtën gjuhë akuzave të Partisë Demokratike për lidhjet me trafikun e drogës.Deputeti socialist, Besnik Bare, në një dalje për mediat nga selia rozë tha se PD kur ishte në pushtet dështoi të luftonte fenomenin.Deklarata për shtyp e deputetit Besnik Bare:
Dëshiroj t'i bëj sot një apel Partisë Demokratike. Një apel për të qenë më realiste dhe mbështetës, të paktën në ato raste kur Policia e Shtetit arrin suksese të padiskutueshme në luftën kundër krimit dhe trafikut.
Është normale që opozita të kritikoje qeverinë, por opozita bëhet e pabesueshme kur e sulmon policinë pse ndërhyri në Lazarat, apo pse i dha fund një operacioni të fshehtë prodhimi dhe trafikimi lëndësh narkotike.
Pyetja nuk është pse policia arriti me sukses të arrestonte dhe sekuestronte një laborator sekret droge. Pyetja është pse gjatë gjithë viteve të qeverisjes së PD një laborator i hapur, në natyrë, drogë, që nuk ishte mister për askënd, u la në liri të plotë.
Ndaj, përveç debateve politike të cilat edhe pse të tepruara janë deridiku normale, të paktën në suksesin e policisë le të jemi të bashkuar pasi lufta ndaj drogës dhe krimit nuk duhet të ketë ngjyrime politike.
