Protesta në Hungari, mijëra vetë në rrugë kundër korrupsionit
Nga OraNews Përditësimi i fundit 5 Dhjetor 2014, 14:59
Mijëra hungarezë dolën të enjten në protesta për të shprehur zemërimin ndaj dyshimeve për korrupsion në tatime dhe për të kërkuar më tepër reforma demokratike.Ata pretendojnë shkarkimin e Drejtores së Tatimeve, Ildiko Vida, e cila pranoi para pak kohësh se ishte në listën e zyrtarëve të lartë hungarezë të cilëve Shtetet e Bashkuara u kishin hequr të drejtën e vizës. Megjithatë ajo i mohon akuzat.Turma marshoi nga ura historike mbi Danub deri në zyrat e Presidencës, duke shfaqur parrulla kundër Vidas dhe kryeministrit Viktor Orban.Organizatori i protestës dhe ish-deputeti i opozitës, Gabor Vago, akuzoi qeverinë për përvetësim të pasurive shtetërore e private, për korrupsion dhe favorizim të monopoleve.Protestuesit u shprehën mjaft të acaruar për akuzat për korrupsion në zyrën e taksave dhe gjithashtu për sjelljen e përgjithshme të politikanëve të tyre.Përveç njerëzve të thjeshtë, në protestë kishte edhe shumë sipërmarrës të biznesve të vogla dhe të mesme, të cilët kanë hasur vështirësi të mëdha në vitet e fundit. Ata janë të shqetësuar pasi pavarësisht se i paguajnë taksat, nuk janë të sigurt se ku përfundojnë paratë e tyre.Viktor Orban ka befasuar së fundmi partnerët perëndimorë të Hungarisë për politikat fiskale që kanë penalizuar bizneset e mëdha, si dhe për kufizimin e lirive demokratike, ndërkohë që kritikët thonë se vendi po drejtohet gjithnjë e më pranë orbitës së Kremlinit.
