SHISH mohon akuzat: Asnjë takim me agjenten ruse, do padisim shpifësit
Nga OraNews Përditësimi i fundit 19 Shtator 2013, 18:00
Shërbimi Shtetëror Shqiptar ka përgënjeshtruar lajmet për takimin e shefit të shërbimit me një agjente ruse, te quajtur Ollga. Në një njoftim për mediat, Shërbimi Shtetëror Shqiptar thekson të gjitha këto informacione janë absolutisht të pavërteta. Sipas SHISH këto janë përpjekje të njëpasnjëshme nga disa media, me qëllim dëmtimin e veprimtarisë institucionale të Shërbimit Informativ të Shtetit, nëpërmjet informacioneve të sajuara, të gënjeshtërta dhe denigruese ndaj Drejtorit të SHISH.“Ndjejmë detyrimin për të sqaruar opinionin publik, se janë bërë përpjekje të njëpasnjëshme nga disa media, me qëllim dëmtimin e veprimtarisë institucionale të Shërbimit Informativ të Shtetit, nëpërmjet informacioneve të sajuara, të gënjeshtërta dhe denigruese ndaj Drejtorit të SHISH. Të gjitha këto informacione janë absolutisht të pavërteta. Ato pengojnë direkt apo indirekt ushtrimin e veprimtarisë së këtij institucioni tepër të rëndësishëm të sigurisë kombëtare. Media ka hapësirat e veta ligjore të cilat mund ti shfrytëzojë lirisht për të informuar opinionin publik mbi ngjarje dhe situata, por në asnjë moment nuk mund të përligjim një përpjekje disinformuese, të ulët dhe aspak dinjitoze” thuhet në deklaratë.Në vijim të deklaratës, SHISH garanton se përpjekje të tilla nuk do të ndikojnë në vijueshmërinë e punës së këtij institucioni, ndërsa siguron se do të ndërmarrë të gjitha hapat e duhura ligjore, për vendosjen para drejtësisë së autorëve të këtyre shpifjeve, duke ju drejtuar institucioneve kompetente.“Ju informojmë se përpjekje të tilla nuk do të ndikojnë në vijueshmërinë e punës së SHISH, në përmbushje të misionit të tij, ruajtjen e sigurisë kombëtare, në respektim të të gjithë kuadrit ligjor ekzistues. Gjithashtu ju sigurojmë se do të ndërmerren të gjitha hapat e duhura ligjore, për vendosjen para drejtësisë së autorëve të këtyre shpifjeve, duke ju drejtuar institucioneve kompetente. Ky veprim diktohet nga intensiteti në rritje i publikimit të informatave të rreme si dhe nga detyrimi ligjor për të mbrojtur veprimtarinë e punës së institucionit", perfundon deklarata e sherbimit informative shteteror.
