Shkodra nuk thahet, 1400 Ha nën ujë, në Lezhë situata drejt përmirësimit
Nga Ora News Përditësimi i fundit 24 Janar 2023, 08:34
Pavarësisht se situata e motit në vendin tonë ka nisur duke u përmirësuar në shkodër 1400 hektarë sipërfaqe mbeten nën ujë. Në Lezhë sipërfaqja e përmbytur është ulur në 230 hektarë. Ndërkohë zonat malore të Shkodrës janë mbuluar nga dëbora, por shumica e rrugëve janë të kalueshme.
1400 hektarë tokë vijojnë të jenë nën ujë në zonën e Nënshkodrës.
Rruga për në fshatin Obot edhe të martën ka prezencë uji në masën e 75 centimetrave, ndërsa oborret e 15 banesave atje janë të përmbytura.
Pavarësisht situatës nivelet e lumenjve dhe liqenit të Shkodrës janë stabile.
Niveli i lumit Drin në hidrometrin tek ura e Bahçallëkut shënon kuoten 6.10 metra, ndërsa kuota maksimale është 7.50 metra, ndërsa niveli i Liqenit në hidrometrin tek ura e Bunës shënon 8.55 metër ndërsa kuota maksimale është 8.70 m
Informacionet zyrtare flasin për 10 fshatra të Njësisë Administrative Temal që nuk kanë energji elektrike, si dhe në të gjitha fshatrat e Njësisë Administrative Shllak.
Sa i përket reshjeve të dëborës aksi Bogë-Theth është funksional ndërsa Me rënien e temperaturave po punohet për hapjen e segmentit rrugor në Qafë Thore që është bllokuar nga dëbora.
Nga ana tjetër situata e krijuar nga përmbytjet në Lezhë ka njohur sërish përmirësim.
Sipas të dhënave zyrtare të Emergjencave Civile, sipërfaqja e përmbytur është zvogëluar në 230 hektarë, nga 350 që ishte të hënën.
Lumi Drin është në nivelin 0.6 m, nga +2.0 m që është kuota kritike, kurse kuota e lumit Mat vazhdon të kete gjendje të ngritur duke shkuar tek normalja, për shkak të shkarkimeve të hidrocentraleve Ulëz e Shkopet
Në juglindje disa fshatra përfshirë ato turistikë janë përfshirë nga reshjet dëborës ndërsa raportohet se të gjitha akset janë të hapura, përveç atij të fshatit të Panaritit.
