Tërmeti dëmton 23 shtëpi, banorët e prekur në disa fshatra të Dibrës e kalojnë natën jashtë

Nga OraNews Përditësimi i fundit 16 Janar 2023, 16:28

Tërmeti i të dielës dëmtoi 23 shtëpi në qarkun Dibër. Problemet më të mëdha janë vërejtur në ato banesa që janë dëmtuar nga tërmetet e mëparshme. Grupet e punës kanë nisur evidentimin e pasojave në terren, ndërsa banorët të frikësuar thonë se do t`i kalojnë netët jashtë pasi shtëpitë u rrezikojnë jetën.

Mure të çara nga dyshemeja në tavan. Familja Hoxha me 7 anëtarë, më i vogli ende në djep, është një prej më të dëmtuarave në fshatin Xibër Hane të Klosit.

"Shumë panik, dolëm jashtë të gjithë."

Tërmeti i të dielës gati ua ka shkatërruar shtëpinë.

"Plasjen më të madhe e ka marrë mbrëmë, dyshemenë e ka lëviz shumë."

Thonë se rrezikojnë jetën nëse qëndrojnë brenda saj ndaj edhe netët do i kalojnë jashtë.

"Kishim frikë me u fut brenda."

Prefekti i Dibrës, Nexhbedin Shehu, tregon së në total janë dëmtuar 23 banesa.

"Më shumë ka Klosi me 13 banesa, 8 banesa Xibri dhe 25 banesa Gurra."

Shkollat e qendrat shëndetësore nuk kanë pësuar dëme.

"Kemi dëmtime vetëm në banesa."

Këtë të hënë janë ngritur grupet e punës për evidentimin e pasojave të tërmetit.

Por në disa fshatra të qarkut Dibër, banorët thonë se askush nuk ka shkuar t`i shohë.

"Dola nga shtëpia, më mirë të marr plavitje sesa të vdes."

Dëmet i kanë të mëdha pasi banesat u janë prekur edhe nga tërmetet e viteve të shkuara.

"Dëme të lehta u ka bërë."

Disa detyrohen të qëndrojnë në qiell të hapur në temperatura të ulëta e të tjerë thonë se do të gjejnë strehë te të afërm.

"Do shkojmë te njerëzit tanë, është çarë komplet shtëpia."

Mes ndërtesave të dëmtuara është edhe ky pallat në Bulqizë, i cili ka pësuar plasaritje edhe në tërmetin e vitit 2019.

Në Klos ditët e fundit janë regjistruar disa tërmete më i madhi ishte ai i të dielës me magnitudë 4.7 i shkallës Rihter.

Shenim: *Ky është artikull ekskluziv i Ora News, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Ora News” bashkëngjitur me linkun e artikullit origjinal.