"Ikën dielli, vjen shiu e dëbora": Bien temperaturat në të gjithë vendin, në Korçë e Shkodër nis dëbora
Nga Ora News Përditësimi i fundit 10 Janar 2023, 09:17
Reshjet e shiut që kanë përfshirë vendin tonë nga e hëna, kanë shkaktur edhe problematikat e para.
Ndërkohë në zonat malore të Korçës dhe Shkdorës ka pasur edhe reshje dëbore.
Të gjitha akset nacionale paraqiten të kalueshme, ndërsa rënia e temepraturave pritet të vijojë edhe në ditët në vijim.
Ditëve me diell duket se u erdhi fundi.
I gjithë vendi ynë është përfshirë që nga e hëna në mot të paqëndrueshëm me reshje shiu, dhe dëbore.
Këto pamje vijnë nga Dardha në Korçë, paraditen e së martës.
Reshje dëbore kishte edhe në zonat e tjera të Korçës.
Edhe në veri të vendit përkatësisht në Zonën e Thethit dhe Vermoshit, ka pasur reshje dëbore.
Ndërkohë problematika janë shënuar nga reshjet e shiut.
Në rrugën Mes-Ura e Shtrenjtë në Postribë Shkodrës, ka pasur rrëshqitje të mëdha gurësh që kanë bllokuar rrugën.
Reshjet e dendura të shiut të rëna gjatë natës, krijuan probleme edhe në Lezhë.
Në blloqet e banimit "11 janari" dhe në lagjen"Besëlidhje", ka pasur prezencë uji në rrugë, duke vështirësuar lëvizjen e qytetarëve dhe automjeteve.
Kanalizimet nën tokësore nuk e përballuan nivelin e lartë të prurjeve, duke sjellë këtë situatë problematike.
Ndërkohë në zonat bregdetare është pezulluar lundrimi për mjetet e vogla dhe varkat e peshkimit.
Sipas meteoalb, nga e mërkura e në vijim do të ketë mbizotërim të motit të qëndrueshëm, kthjellime dhe kalime të pakta vranësirash ndërsa Gjysma e dytë e janarit pritet të sjell dimrin tipik, në vend.
