“S'është lajm që Rama mblodhi qeverinë”, Baçi: Në 10 vite nuk ka mbajtur përgjegjësi, as ka dhënë llogari
Nga OraNews Përditësimi i fundit 6 Janar 2023, 15:53
Analisti, Agim Baçi në një intervistë për Ora News me gazetaren Anila Zyberaj tha se kryeministrin Rama “Në këto 10 vite nuk e kemi parë asnjëherë kryeministrin të mbajë përgjegjësi dhe të japë llogari”.
Sipas tij dhe paketa e ndihmës e dhënë për njerëzit në nevojë është “thjesht për fushatë elektorale”.
“Dhe pakoja e madhe është thjesht një tendencë ku shpërndahen paratë publike sapo fillon fushata elektorale”, tha ai.
Agim Baçi: Është e turpshme për ne, nuk përbën lajm në asnjë vend të botës që kryeministri mblodhi qeverinë. Është gjëja më normale në botë. Kjo është një tallje e madhe. Më vjen keq të jepet lajm që kryeministri ka mbledhur qeverinë. Në këto 10 vite nuk e kemi parë asnjëherë kryeministrin të mbajë përgjegjësi dhe të japë llogari. Një qeveri që nuk jep llogari dhe nuk mban përgjegjësi është jashtë shinave. Unë e kam thënë se Rama deri diku e ka konfirmuar dhe vetë kur ka thënë se nuk mbaj përgjegjësi se sa letra firmos dhe nga ana kushtetuese nuk është më i ligjshëm.
Qeveria ka nisur fushatën elektorale dhe mendon se çdo para që do të hedhë është thjesht për fushatë elektorale. Dhe pakoja e madhe është thjesht një tendencë ku shpërndahen paratë publike sapo fillon fushata elektorale. Ky nuk është modeli. Modeli është se çarë ke bërë ti për të mos u rritur çmimet, jemi në një fushatë elektorale, unë ndjej keqardhje që me paratë publike t’ju blesh votën qytetarëve.
