Vlora e bukur bëhet pis, tymi kancerogjen mbulon lagjet pas djegies së gomave
Nga Edi Ruçi Përditësimi i fundit 20 Dhjetor 2022, 09:55
Katastrofë mjedisore në Vlorë.
Një grumbull gomash u dogjën në mëngjesin e së martës në lagjen “24 Maji”, pranë hidrovorit.
Shtullungat e tymit kancerogjen dhe grimcat helmuese që çlirohen nga djegia e gomave, mbuluan lagjet periferike dhe ishin të dukshme nga zona të ndryshme të qytetit bregdetar.
Siç tregojnë pamjet, situata që u krijua ishte shqetësuese dhe ndotja e çliruar alarmante.
"Strukturat e shtetit ta marrin në konsideratë që të shërbejë si masë parandaluese"
Dyshimet janë se djegia e gomave është e qëllimshme, ndaj të paktën 4 persona janë shoqëruar për tu pyetur në policinë lokale, pas veprimeve të para hetimore.
Zjarri mori përmasa të mëdha dhe për ta vënë nën kontroll, u kërkua ndërhyrja e dy mjeteve zjarrfikëse.
Poll
Një banor i zonës tha se djegia e gomave dhe materialeve të tjera, është fenomen i përsëritur.
Banori: “Tym kemi parë shpeshherë këtu”
Rreth fushës së mbetjeve janë 3 lagje “1 maj”, “24 maj” dhe “Kushtrimi” dhe banorët e tyre janë të parët që vuajnë pasojat e këtij tymi kancerogjen.
Gjatë muajve të verës, fushës së mbetjeve në Vlorë iu vendos disa herë zjarri, ku dyshimet janë se autorët kryesisht janë persona që mbledhin materiale të riciklueshme.
