Rama kritika prokurorisë: Dënojnë për ndërtim pa leje Mimoza Ahmetin, janë të dobët me të fortët
Nga OraNews Përditësimi i fundit 15 Nëntor 2022, 20:27
Kryeministri i vendit Edi Rama ka reaguar në Twitter për dënimin e poetes Mimoza Ahmeti për ndërtim të paligjshëm.
Ai shkruan se pas një këngëtari, Bojken Lako, është dënuar edhe një poete me zell nga Prokuroria e Tiranës, ku dosjet për ndërtime të paligjshme flenë të patrazuara.
Ai shton se Patjetër që çdo ndërtim pa leje është i dënueshëm me ligj, po zelli milimetrik në dënimin e atyre që e shkelin ligjin në pronën e tyre të bën për të vjellë përballë mosveprimit sistematik të Prokurorisë së Tiranës.
Rama: Pas një këngëtari, ja edhe një poete që dënohet me zell nga pikërisht Prokuroria e Tiranës, ku dosjet e denoncimeve nga organet shtetërore për ndërtime të paligjshme për qëllim fitimi apo për evazion fiskal me miliona USD dhe për pastrim të miliona USD, flenë të patrazuara! Patjetër që çdo ndërtim pa leje është i dënueshëm me ligj, po zelli milimetrik në dënimin e atyre që e shkelin ligjin në pronën e tyre të bën për të vjellë përballë mosveprimit sistematik të Prokurorisë së Tiranës ndaj atyre që për qëllime fitimi bëjnë shkelje kilometrike! Tamam “mbretëri xhuxhash” ai organ drejtësie me të dobëtit dhe dobësie me të fortët.
Rama i referohet një lajmi të publikuar nga gazetarja Anila Hoxha në Top Channel ku bëhet me dije se Ahmeti është dënuar me 40 orë pune në komunitet.
