Golemi nuk kujtohet për lagjet, në Gjirokastër ndotja arrin nivele alarmante, banorët e shqetësuar
Nga Entjola Budo Përditësimi i fundit 30 Tetor 2022, 14:48
Banorët e shtëpive private qe ndodhen krah përroit te lagjes blloku i furrave në Gjirokastër kanë denoncuar ndotjen e madhe nga përroi. Ata thonë se ujerat e zeza që derdhen në përrua, dhe mbeturinat e mëdha që hidhen aty janë duke shkaktuar një ndotje që për ta është alarmante, ndërsa akuzojnë bashkinë e drejtuar nga flamur Golemi se nuk ka marrë asnjë masë.
Mbetje urbane deri tek kafshët e ngordhura, kjo është panorama e përroit në lagjen Blloku i Furrave në Gjirokastër.
Edhe ujërat e zeza derdhen në këtë përrua të hapur.
Banorët thonë se situata është bërë alarmante.
“Sa fillon pak koha e mirë na qelb era, nuk mund të rrish. Pastruesit nuk kanë ardhur.”
“Është situatë alarmante, lagështirë e madhe. Qelbet erë”
Thonë se Bashkia e drejtuar nga Socialisti Flamur Golemi është në dijeni të problemit, por askush nuk po i jep zgjidhje.
“Më thanë mua se do të vijnë ta bëjnë, por kur do të vijnë ta bëjnë.”
“Nuk merrja dot frymë nga e keqja. Është erë shumë e rëndë, nuk ta di njeri.”
Zona që përshkohet nga përroi është në aksin kryesor që kalojnë mijëra turistë nga mbarë bota që vizitojnë Gjirokastrën.
