“Ka ndodhur në përgjegjësinë e policisë”, Strazimiri: Po ta kishin dërguar menjëherë në spital Lear Kurti do të ishte gjallë
Nga OraNews Përditësimi i fundit 24 Tetor 2022, 17:09
Ish deputeti Gent Strazimiri në një intervistë për RTV ORA me gazetaren Besmira Pelushaj foli rreth rastit të 32 vjeçarit Lear Kurti i cili humbi jetën në duart e policisë.
Strazimiri pohon faktin se ka mungesë transparence dhe thotë se përgjegjës për këtë gjë janë Ardi Veliu dhe Bledi Çuçi.
Gent Strazimiri: Unë jam nën efektet negative të intervistës së djeshme të nënës së viktimës që hedhin poshtë gjithë atë çfarë ka thënë policia. Ka mungesë transparence. Besimi i publikut te institucionet shtetërore veçanërisht te policia është minimale. Me këto zvarritje me këto gjysma të vërtetash mendoj se është kompromentuar rezultati se sido të dali do të jetë i kompromentuar. Është një person i cili ka gënjyer për raste të ngjashme. Ardi Veliu është personi më i papërshtatshëm për të hetuar këtë rast. Veliu me ligj është instrument që ministri ka për ligjshmërinë e policisë. Ardi Veliu dhe Bledi Çuçi janë përgjegjës, të bëjnë transparente ngjarjen.
Ish deputeti thotë se policët nuk u shqetësuan për shëndetin e 32 vjeçarit si dhe thotë se nëse do ta kishin dërguar menjëherë në spital do të ishte gjallë.
Gent Strazimiri: Ajo që më bënte përshtypje sot është se nga videot e nxjerra nga gazetarët nga të thënat e miqve rezulton se ngjarja ka ndodhur te dera e Spitalit të Traumës. Ata nuk janë shqetësuar për shëndetin e tij. Kur kanë parë se ka vdekur e kanë çuar për në spital. Po ta kishin dërguar menjëherë në spital do të ishte gjallë. Kjo ka ndodhur në përgjegjësinë e policisë së shtetit. Policia e ndjen veten me ç’profesionalizëm, zot të jetës.
