Gjermania merr në dorë situatën: Deri më 15 prill, tre centrale bërthamore do të qëndrojnë në funksion
Nga OraNews Përditësimi i fundit 17 Tetor 2022, 22:11
Tre termocentralet bërthamore të Gjermanisë do të qëndrojnë në funksion deri në mes të prillit, sipas vendimit të kancelarit Olaf Scholz, duke i dhënë fund një mosmarrëveshjeje ndërqeveritare për këtë çështje.
Sipas një letre të kancelarit drejtuar ministrave përkatës, kuadri ligjor duhet të vendoset menjëherë që termocentralet bërthamore Isar 2, Neckarvestheim 2 dhe Emsland të mbeten në funksion pas datës 31 dhjetor dhe maksimumi deri më 15 prill.
Tre termocentralet e mbetura bërthamore të Gjermanisë do të çmontoheshin përgjithmonë në fund të këtij viti, sipas qeverive të mëparshme.
Gjatë javëve të fundit fati i stacioneve ishte kthyer në një debat mes Liberalëve (FDP), të cilët kërkuan që ato të qëndronin në funksion deri në vitin 2024 dhe ndoshta rihapjen e stacioneve tashmë të mbyllura, dhe të Gjelbërve, të cilët pas shumë presioneve pranuan që dy stacionet të mbeten në rezervë deri në prill dhe shfrytëzimin e tyre vetëm nëse lind nevoja reale.
Në fakt, konferenca e të Gjelbërve dje në Bon nxori edhe një rezolutë lidhur me këtë.
Olaf Solz ka tentuar vazhdimisht të arrijë një marrëveshje me dy partnerët e tij, megjithatë ushtrimi i së drejtës së tij absolute në mbrëmje interpretohet si dështim i përpjekjes për të gjetur një zgjidhje kompromisi.
Udhëheqësi i FDP-së dhe ministri i Financave, Christian Lindner, shprehu kënaqësinë e tij për vendimin e Scholz.
“Është në interesin jetik të vendit të ruajë të gjitha kapacitetet e prodhimit të energjisë këtë dimër. Kancelari tani e ka bërë të qartë”, shkroi ai në Twitter dhe premtoi zgjidhje të qëndrueshme për dimrin 2023-2024.
Nga të Gjelbrit, Ministrja e Mjedisit Steffi Lemke shkroi: “Tani ka qartësi. Ndalimi bërthamor mbetet. Gjermania do të heqë përfundimisht energjinë bërthamore më 15 prill 2023”.
