Barazim zhgënjyes në Elbasan, Partizani përplaset me “murin” krutan
Nga OraNews Përditësimi i fundit 16 Tetor 2022, 19:45
Zhgënjen Partizani që pak ditë pas fitores në Shkodër rikthehet në një rezultat që nuk bind dhe për më tepër ndaj një kundërshtari që konsiderohet i kalueshëm në letër. Nuk ka asnjë gol në “Elbasan Arena” mes të kuqve dhe Kastriotit në një ndeshje të luftuar kryesisht në mesfushë nga të dyja skuadrat.
Kryesuesit e kampionatit, tashmë me vetëm një pikë më shumë se Tirana ndjekëse, e rritën ritmin në pjesën e dytë por as Da Silva dhe as Skuka e Hoti nuk mundën të shënjestronin saktësisht portën e krutanëve që ndërtuan një ndeshje të bazuar kryesisht te loja mbrojtëse ndërsa nga stoli edhe pse nuk kanë mbështetjen e trajnerit Çela të dënuar, treguan grintën e duhur, duke vijuar ecurinë e rezultateve pozitive.
Rasti më flagrant u regjistrua në minutën e 46 kur Cara u ndal nga shtylla ndërsa pak çaste më parë edhe Murataj dogji mundësinë për të shënuar golin që mund tëv çlironte këmbët e Partizanit. Barazimi e ngjit kastriotin në kuotën e 10 pikëve në vendin e gjashtë me vetëm një pikë diferencë nga Vllaznia dhe Bylis ndërsa skuadra e Colellas duhet të bëjë llogaritë me Tiranën ndjekëse por tashmë nga shumë pranë.
