“Luftë” me zjarr në Bilisht/ Punonjësit të deputetit Nallbati i digjet makina, në polici edhe Deizi Arapi
Nga Ora News Përditësimi i fundit 10 Tetor 2022, 08:31
Makina e një të riu u dogj në Bilisht, gati dy javë pasi ai u akuzua si zjarrvënësi në makinën e një 27 vjeçareje e njohur në rrjetet sociale si “Gangsterja e Bilishtit”. Policia ndërkohë deri më tani ka qenë e pafuqishme të gjejë autorët dhe të ndalojë këtë luftë me zjarrvënie.
Një “luftë” me djegie makinash si pasojë e konflikteve ka nisur në Bilisht.
Mjeti në pronësi të Marsel Buçit u shkrumbua në orët e para të mëngjesit të së hënës, ndërsa ishte i parkuar.
Dyshimet janë për zjarrvënie të qëllimshme pas të cilës besohet se është hakmarrja.
I riu ishte akuzuar nga Deizi Arapi, vajza e njohur në rrjetet sociale si “Gangsterja e Bilishtit” se i kishte djegur mjetin, pak javë më parë.
Ndaj edhe Marsel Buçi ka vendosur emrin e 27 vjeçares në krye të listës së të dyshuarve për djegien e makinës.
Por vendi ku ndodhej i parkuar mjeti, është i pambuluar me kamera sigurie, dhe identifikimi i zjarrvënësve është i vështirë.
Deizi Arapi, mësohet se ishte mes personave të shoqëruar në polici në kuadër të hetimeve për zjarrvëniet e qëllimshme të mjeteve në qytetin e Bilishtit.
Pasi i dogjën makinën më 25 Shtator, 27 vjeçarja Deizi Arapi akuzoi ish-kryebashiakun, tashmë deputet të Partisë Demokratike, Bledion Nallbati se ishte pas kërcënimeve që pretendon se po i bëhen.
Marsel Buçi, të cilin ajo akuzonte si zjarrvënës, rezulton se punon në një karburant i njohur si në pronësi të deputetit demokrat.
Ky i fundit, pas akuzave të 27 vjeçares, mohoi konfliktet me të dhe paralajmëroi padi për prishje imazhi.
Marsel Buçi dhe makina e djegur
